Gin Lee跟老竇學飆車
歌手李幸倪（Gin Lee）昨日出席「2018日產GT-R傳媒發布會」，問到可想買跑車？她表示：「遲啲先，我係幾鍾意揸車，但香港路窄，好大壓力，所以我喺香港好少揸車，遲啲等我熟路同練習好揸車技術先再買。」
她又自言細膽，不喜歡飆車，自爆中學時坐過男同學揸的快車，嚇到她有很大陰影：「公路上有140km（時速）咁快，好驚有生命危險，但因為趕住去考試，所以好不幸咁坐咗佢架車。我有同佢講其實可以揸慢啲，但佢唔聽，之後我就冇再同佢聯絡，太驚啦。」問到是否對揸快車的男生沒有好感？她指爸爸教她要學識揸快車，但要趕時間才揸：「所以唔係揸快車嘅就一定係衰人，最緊要安全為先。」
氣管炎初愈
問到6月紅館演唱會的籌備情況，Gin坦言近日因忙於宣傳及排練，以致睡眠不足，患上氣管發炎，她說：「咳咗幾晚瞓唔到，但依家好番啦。（影響演唱會進度？）我呢個星期停晒做Gym、排舞，暫時休息先，過多兩日可以再操番。」提到其身形Fit過以前，她坦言距離目標還差少少：「我想減多兩公斤，同埋想線條再明顯啲。」
Deep V濕濕碎
她在台上預告個唱服裝和音樂都是無底線，她坦言最重要是表演精彩、好睇及好聽，問到服裝可會是有史以來最性感？她直言未知：「因為仲度緊啲衫，未確定，但我冇底線，靚就得。」問到Deep V可會接受？她說：「冇問題，碎料。（咩先係勁料？）我都唔知，因為冇底線，我都好期待。」
文：音樂組