李日朗為女友剝蝦殼餵食「殘廢餐」
前英皇藝人李日朗（Don）與模特兒女友黃靜藍（Nam）感情穩定，日前二人拍拖往酒店歎自助餐，期間Don化身廿四孝男友，剝埋蝦殼餵伊人，氹到全程食「殘廢餐」的Nam冧爆甜笑。
事業浮沉的李日朗（前名李逸朗）轉戰內地賺人仔，更曾與朱晨麗傳出緋聞，近年他則與索模黃靜藍拍拖。Don與女友Nam蜜運多時，早已公開戀情的二人不時孖住出席活動，極為恩愛，男方早前還透露儲定老婆本，可見兩人感情穩定。最近忙於在內地拍攝自導自演新片的Don，日前難得回港，即與女友拍拖到佐敦一間酒店，歎自助餐橕枱腳。
體貼做跑腿
當日傍晚六時許，戴上鴨舌帽的Don與女友雙雙現身餐廳，期間他對女友照顧有加，多次出出入入為女友拿食物。見Don拿了大碟靚蝦回位後，更親手剝蝦殼，餵埋入女友口中，轉頭他又再做跑腿，捧着大碟食物回來餵飽女友。全程食「殘廢餐」的Nam見男友如此體貼，當然冧到爆，不時甜笑與Don邊食邊談情。
為甜品「出動」
而食至尾聲Nam終於「出動」，起身前往拿甜品，見她左揀右揀掃了一整碟甜品才返埋位慢慢歎。胃口極好的她之後又再與Don出去拿雪糕，兩人揀選味道時有商有量，但當引來食客目光時，他們即顯得有點避忌，急急腳返回座位。
文、攝：追蹤組