舒淇大方送祝福笑黎明有排忙
女星舒淇及惠英紅昨晚出席BVLGARI珠寶活動，舒淇以低胸裙配襯超過2,100萬珠寶，而惠英紅則以逾1,400萬首飾登場，貴氣十足。
舒淇事先已透過公關表明不回應私事，但當記者追問其舊愛黎明榮升父親，她仍大方回應：「我會透過其他人恭喜佢，佢都好忙啦！（有冇留意佢嘅漢奸論？）冇，做藝人係公眾人物，但都有私隱權。」對於「四大天王」變身「四大外父」，舒淇聞言笑到合不攏嘴：「我唔知呀，呢啲係人生階段，過20年後先再講啦！」
惠英紅讚陳家樂開竅
至於惠英紅談到身上珠寶即說：「呢套專程喺羅馬空運抵港。（你個好拍檔陳家樂近期人氣急升。）我都有追睇佢套《逆緣》，好好睇，佢開咗竅，第一次合作佢淨係背劇本，第二次已好明顯有進步，依家佢係樂哥，遲啲係樂爺添，要教番我，睇佢肯唔肯同我第三次合作啦！」因工作關係，她近日經常北京、廣州兩邊飛，只能趁車程及搭飛機時爭取時間休息。
文：影視組