韋家雄瞞住嫩「妻」搵「新歡」

「綠葉王」韋家雄與圈外女友Keynes相戀數月,已計劃在今年內拉埋天窗,但最近竟然獨自去「偷歡」!過往以電單車代步的他,日前單拖現身九龍灣一間車行,不停騰出騰入睇心水新車,似是給未婚妻一個驚喜!

52歲的韋家雄於廿多年前與前妻奉子成婚,後來婚姻破裂,兒子選擇跟他一起生活。年前他與圈中人陳嘉嘉拍拖,兩人同居三年,有指女方父母嫌他年紀大,最終分手收場。自認是愛情失敗者的韋家雄,今年初突然在社交網上載與年輕近廿年圈外女友Keynes的啜爆相放閃,公告「破Dry」,雖然兩人拍拖僅數月,但已計劃在今年內結婚。

鐵騎周街泊

平時愛獨來獨往駕駛電單車的韋家雄,為未婚妻終於決心買私家車,即使落雨外出拍拖遊車河都唔會淋濕身。日前下午5時許,戴住頭盔、一身「鐵騎」裝束的韋家雄,神神秘秘獨自駕駛電單車離開將軍澳寓所,直駛到九龍灣,將電單車停泊在該處一間車行門外,然後除頭盔步入車行。

360度視察

未幾職員陪他出門外揀選「新歡」,見他圍繞着其中一部新車慢行一個圈,之後又折返入內與職員傾談,並簽了一些文件。其後韋家雄拿着文件又再出門口睇車,出出入入車行數次,逗留約半個小時多,依依不捨地揸電單車離開。

文、攝:追蹤組