陳漢娜克服驚青：我想做殺人犯
影壇新貴陳漢娜入行後機會甚多，但原來她求學時零表演欲，更害怕面對群眾，一心投身電影幕後。她直言現在要努力改變緊張膽怯個性，而外表文靜的她竟然最想挑戰演殺人犯或嘗試做諧星！
24歲新演員陳漢娜（Hanna）不似普遍女星Sell親切開朗，她不笑時有種冷若冰霜的距離感，在鏡頭內有一種特別的氣質；但當她笑的時候擠出酒窩，亦不失甜姐兒感覺。
細個想做幕後
Hanna繼在電影中飾演古天樂女兒後，將與林家棟、任賢齊等合作並擔正女主角，前途無限，但她透露入行是無心插柳，小時候完全沒表演欲，反而想做幕後：「細個冇諗過做演員o架！我讀美術、設計，我好鍾意電影，諗住畢業後做幕後。可能係緣分，令我有機會演戲，依家仲愛上做演員。」她坦言入行前從沒演戲經驗：「真係冇o架！冇玩舞台劇、劇社，驚面對好多人，成為全場焦點好緊張！但入行後要克服，試過做宣傳，側邊好多勁人，到我上台講嘢，緊張到聽唔到自己講咩，依家叫好咗啲。」對於被封為「新文青女神」，Hanna直言嗜好文靜，例如睇戲、睇書、畫畫，喜歡的運動亦是一個人跑步，不過慢熱的她笑言跟好友相處時也會很嘈吵。
自認有喜劇天分
Hanna曾飾演反叛少女，因離家出走到泰國最終慘被殺害，她直言對這類題材較黑暗的電影情有獨鍾，希望能繼續挑戰：「其實我咩都想演，令自己不斷進步，但我鍾意睇啲比較Dark嘅戲，想做殺人犯、精神有問題嘅角色！平時我個人太正經喇！要做啲唔同嘅嘢。」她坦言因外形而多被安排演陰沉角色，甚少有人找她演活潑角色，但自認有喜劇天分：「最近有劇組人員話我啱做諧星，可能講嘢太白癡，證明可以試吓做喜劇，不過我知好難演！」
文：影視組
攝：吳文聰
場地：Goobne Chicken
鳴謝：Barry@relaxdearhk
化妝：Chichi Li
髮型：will yu@the attic