張家輝獨裁領「導」張可頤爆難服侍

影帝張家輝第三次執導演筒，開拍電影《低壓槽》，片酬千萬計的他為全情投入該片的籌備及拍攝，有近兩年時間沒有簽其他片約，「失去」的片酬加起來分分鐘接近《低》片製作費逾1.2億元，家輝說：「真係要同各位老闆講聲唔好意思先！（冇咗咁多錢肉痛？）為理想就唔會肉痛！（製作費比上次嘅《陀地驅魔人》多咗成億，有冇壓力？）咁又冇，反而覺得今次好似小朋友去嘉年華會任玩咁，監製鍾珍縱容我，令我可以決定要啲乜、係咪要重拍。」

為邀得心儀演員演出，家輝試過遊飛機河，專程遠道見演員傾戲及游說演出，但並非一帆風順：「我都係個『有禮導演』，試過好似『三顧草廬』搵演員，但係都慘食檸檬！不過冇辦法，大家都有權選擇嘛。」對於今次「張家輝出品」，他直言不喜歡別人費心：「即使係劇本內嘅一個小角色，我都會自己代入去演一次，成日匿埋喺房自言自語咁。就算對住苗僑偉、張繼聰同張可頤呢啲好戲之人，我都算『獨裁』o架！好多謝佢哋嘅配合。」

張家輝周圍飛誠邀演員，成功搵到苗僑偉與張繼聰等參演。	張繼聰	張家輝做導演又要落場演，但幾辛苦都冇計。

「跟住佢要求去演」

身為女主角的張可頤當着家輝面前，踢爆對方「難服侍」﹕「佢喺片場唔會鬧人，只會用『有效率』嘅聲線同大家講嘢。我拍戲咁耐，都係第一次遇到導演要求我跟住佢嘅要求去演，但佢待人處事好直接，唔會有多餘嘅粉飾。有時大家聽唔明佢講乜，但我值錢嘅地方就係聽得明佢囉！」

文：影視組

場地：馬哥孛羅香港酒店