50歲謝天華再做爹哋送大禮獎老婆
藝人謝天華昨日宣布即將再為人父，太太懷有第二胎！身在內地拍電影的他透露要一直忙到年底，明言會補送大禮答謝太太。而佘詩曼亦戥老友開心，又大讚天華的太太乖乖戒口，相當抵錫！
現年50歲的藝人謝天華，與太太李天恩（Tina）結婚13載，育有3歲囝囝謝浩飛（天天）。天華雖然不時忙於在內地拍電影，但有心有力，昨日更在社交網晒超聲波照片，宣布Tina再度懷孕！他留言：「今年將會迎接家裏的新成員，感恩感恩！天天要做哥哥了！也辛苦了媽媽。I Love U。」
密密做賺奶粉錢
天華昨日受訪，問到Tina的懷孕周數？他開心地說：「過咗3個月啦！好開心、感恩，會繼續努力工作、搵銀！」問到第二胎是仔還是女，他表示暫時未知性別。提到他現時身在廣州拍電影，是否拍完戲就回港陪太太？他說：「過年之後都未停過！手頭上嘅工作已經排到年尾，好感激老婆辛苦多一次，之後再送大禮補償！」
Tina聽話戒口
天華宣布喜訊後，不少圈中好友都戥他高興，佘詩曼更即時留言讚他叻叻！阿佘受訪時說：「前幾日去天華屋企，見到Tina好乖，好多嘢都唔食，我仲講笑咁話係咪有咗，當時佢兩個笑吓，點知見到今日公布，先知道真係有好消息，當然好戥佢哋開心！」至於洪天明亦第一時間恭喜好兄弟，更問是仔還是女，天明笑說：「佢都話未知，男同女都冇所謂，仔又可以同大嗰個一齊玩，好似我嗰兩個咁，最緊要係小朋友身體健康啫！」
文：影視組