馮盈盈賣大包升Cup撼陳煒

馮盈盈、陳煒、江嘉敏及黃光亮等昨日齊為無綫新劇《果欄中的江湖大嫂》宣傳，盈盈與陳煒齊晒線搶Fo，請現場觀眾大吃冰淇淋。論事業線雖然盈盈不及陳煒，但以低胸Jumpsuit造型打扮的她，不時按壓胸前膠紙防走光，玩遊戲時更跳上李天翔背部施以胸壓，受訪時又自爆經期令上圍升級，非常進擊。

問是否以戰鬥格對抗陳煒？盈盈說：「我啱啱嚟M呀！升Cup係正常現象，冇可能對抗到煒哥，諗都唔好諗！但呢啲嘢（經期）自己控制唔到。」問到近日有否與醫生男友約會？盈盈笑說：「呢幾日先唔好特別約，比較情緒化，前日先為啲小事嗌交，尤其夜晚睇劇，劇中阿哥黃嘉樂會慘死。（拍呢場戲都情緒化？）我好易喊，因為場戲要慢慢喊，我一開始就爆喊做多咗，搞到NG。」但指男友絕不受落她的「催淚彈」。

黃光亮手多多摸陳煒大髀，反被指隻手似沙紙。	馮盈盈玩遊戲時大方胸壓李天翔。	馮盈盈自爆經期令上圍升Cup，夠晒進擊。

床戲陸續有嚟

而陳煒則率先爆劇情，預告將與袁文傑有親密戲份：「會有啲喺床上發生！之前有幕除剩條睡裙色誘佢，睇番先知咁勁。（嚟緊有冇咁勁？）唔記得啦！大家睇啦！」又爆黃光亮於後台無故觸摸她美腿：「問佢摸我隻腳做咩，佢話我一啲反應都冇，證明唔過電！我咪鬧鬼佢！（佢都夠膽鬧？）佢樣惡啫，佢話最怕女人！」

黃光亮偷襲摸髀

黃光亮對於被陳煒爆他怕女人兼偷襲其美腿，他直認：「女人唔可以得罪，唔知聽日會唔會做咗我事頭婆o架！唔驚至奇，佢覺得係畀沙紙擦咗一下！（你個樣都好多人驚你啦！）依家冇人驚，《老表》系列之後做唔到反派，戲路窄咗！王祖藍真係冇陰功，我好憎佢。」

文：影視組