Gin Lee紅館騷加場 破戒菠蘿包炸兩慶祝
入行9年的歌手Gin Lee（李幸倪）終於圓紅館夢，今年6月23日將首踏紅館舉行處女演唱會《Gin Lee First Of All》，據知門票公開發售後，反應熱烈，現宣布加開6月24日一場。Gin昨日在錄音室跟音樂人馮翰銘傾談新歌，當她得悉加場消息後，即第一時間報喜說：「好開心呀！我個演唱會終於可以加場。」更開心得放縱一日，買了蛋撻奶茶慶祝，她笑說：「雖然呢排我好努力Keep Fit，又節食又要做Gym同排舞，但覺得今日好值得獎勵自己，所以買咗最鍾意食嘅蛋撻、菠蘿包同炸兩，仲有一杯熱奶茶，不過大家放心，我只係會食少少。」
日日行程爆滿
Gin表示很感激歌迷的支持：「知道可以加場真係好開心，因為由賣飛開始，覺得如果淨係做一場好可惜，因為咁長時間去籌備，加上團隊一齊努力，所以一路都好希望可以加場，能夠畀多啲觀眾睇到我哋嘅努力同心血。」她坦言多年來都專注音樂工作，沒有其他發展，連花邊新聞都比較少：「所以歌迷買飛入場睇我個騷，證明佢哋係真心聽我啲音樂。」
Gin亦於6月推出新國語專輯，現正計劃下一張新廣東專輯：「日日行程都好爆，係好充實嘅，我開始有啲緊張，因為距離開騷、排練時間愈來愈少，工作就愈來愈多，但每日無論幾攰，返到屋企都會抽時間逼自己背歌詞或者練新歌。」
文：音樂組