李旻芳堅持演藝夢唔係講玩
藝人李旻芳（Lucy）加入無綫節目《東張西望》後，成功入屋，接連參與多個節目，成為新生代主持之一。不過，Lucy曾為入行而放棄高薪厚職，不獲家人支持外，更聽盡「貪玩」、「無謂」等閒言閒語，如今總算撐過來，她明言不會放棄，要繼續向演藝路進發！
Lucy入行五年，近年擔任無綫節目《東張西望》外景主持，開始為人熟悉。成功捱出頭的她回想當初，曾為了圓夢而放棄穩定工作，甚至被家人反對。她說：「當時我做緊空姐，收入唔錯，喺大家眼中算係高薪厚職。不過我依然報名參選2012年嘅香港小姐，因為我再唔參加就超齡，但當時屋企人強烈反對，覺得娛樂圈係一個大染缸，而且收入唔太穩定，反而希望我平平淡淡搵份長工做就算。」
雖然Lucy當年未能入圍港姐第二輪面試，但翌年有新轉機，成功報讀無綫藝員訓練班而入行，期間還結識男友黃耀英，事業及愛情亦見曙光。惟面對眾人反對入行的聲音，她坦言感到難受：「大家覺得我放棄做空姐好無謂，同埋貪玩先會入行，聽到呢啲說話當然會介意、唔開心，因為我都係想演戲先入行啫。好彩入行一段時間，屋企人見到我努力工作冇再反對，自己都冇咁大壓力。」
樂意聽負評
現時主力做主持的Lucy，視金牌司儀鄭裕玲為奮鬥目標，希望能夠在主持及演戲雙線發展，成為全能藝人。她又明言自己有進步空間，不怕接收負評：「我唔會覺得網民畀負評好差，係上咗一堂就真，好似之前參與節目《3日2夜》，有網民話我把聲同表情太浮誇，提醒咗我要檢視同改善自己，下次要做得更加好。」
文：專案組
化妝：FB@irischanmakeup
服裝及飾物：BlindbyJW、Lesnereideshongkong
場地：窩心鍋