HotCha合體：見番都似冇着衫
前組合HotCha將於6月再合體，舉行10周年慈善演唱會。三位成員Crystal、Regen及Winkie前晚為演唱會拍攝海報，期間獲工作人員送上蛋糕，祝賀出道邁向11周年。三人表示今次合體是因身邊愈來愈多人希望聽她們唱歌，而她們亦有意舉行10周年演唱會。對於相隔五年再合體，Crystal表示一開始都擔心會沒有默契：「但尋日食飯拍啲宣傳片，一拍我哋就好多嘢講，係咁講番以前啲搞笑、蝦碌嘢，回憶湧番晒出嚟。」
否認爭仔不和
Regen則分享難忘事，自爆有次出埠工作慶功時飲到好癲，結果由工作地方一直嘔到去機場。她又分享有次到日本工作，沖涼時與兩位成員肉帛相見：「嗰間酒店沖涼要喺公眾浴池，我係第一次同佢哋一齊咁樣沖涼，之後見番佢哋真人都好似冇着衫咁，諗番起個畫面。」
三女坦言曾有拗撬，Winkie笑言是為了爭男人，Regen即否認，並解釋她們喜歡的類型不同，又表示不擔心會再傳不和：「到時啲人入場睇就可以搵到真相。」
文：音樂組
攝：劉斌