莊莎娜激讚又南有上進心！
與歌手黃又南傳緋聞的珠寶店太子女莊莎娜（Sarah），在澳洲大學畢業後回港打理家族珠寶生意，主力設計與Marketing，家姐莊菲娜則負責會計和財務，她說：「做咗三、四年，後來覺得我嘅設計同媽咪嘅珠寶唔係好夾，所以就自己創立品牌，設計啲年輕款式，成立咗一年，幸運地成績唔錯。」
迷外星人寫科幻小說
Sarah的設計創意十足，一件首飾有多種佩戴方法，但原來她的兒時夢想並不是做珠寶設計師，反而想做作家寫科幻小說：「我大學讀媒體寫作，細細個已好迷衛斯理，想做科幻小說家。之前喺內地都出咗本小說，依家寫緊第二本，希望可以喺香港出。我好鍾意外太空、科幻同外星人有關嘅嘢。」Sarah的天馬行空，令她在設計上有更多新穎的構思：「會成日諗啲唔同嘅嘢，對設計好有幫助，但我最鍾意係享受創作過程，無論寫書或設計，由一個概念變成作品，要花好長時間，過程唔容易，但好有成功感。」
用盡腦力搞創作
既要設計珠寶又要寫小說，Sarah直言忙到沒有時間食飯，更何況拍拖：「做珠寶太忙，但每星期會抽一、兩日時間去寫作。（辛苦？）辛苦在個腦用得太多，無論公司發展、設計定寫書情節、人物角色，有時覺得個腦諗到冇晒細胞。」問到早前與歌手黃又南傳緋聞，二人又經常孖咇現身朋友聚會，問到有否發展機會？她笑言：「我想將注意力放喺工作上，感情遲啲先，又南個人好Nice，我哋識咗好耐，佢好有上進心又努力，大家係朋友關係。（佢係你杯茶？）我又冇特別一個理想型，理想男友要溝通到、搞笑，相處到好重要。」
文：專案組