黃蜂腰Vs湯碗胸洪永城嗌正！
無綫劇《丫鬟大聯盟》演員黃心穎、洪永城、湯洛雯與謝東閔等昨日在將軍澳電視城一個山洞場景拍攝，黃心穎與湯洛雯以波斯肚皮舞女郎扮相示人，分別騷纖腰及晒「事業線」鬥性感，洪永城笑說：「唔少同事見到心穎個造型都流晒口水，佢同湯洛雯跳舞係正嘅。」黃心穎則笑說：「完全冇！唔好聽佢亂講。」又自言纖腰不夠弗，因開工無暇操練。
謝東閔唔敢望
至於湯洛雯的「事業線」令拍檔謝東閔不敢斜視，十分搞笑，她笑說：「唔夠弗唔想露腰，公司就揀咗呢件衫畀我！原本更加性感，已經加咗塊布，同埋拉高咗件衫。」提到愚人節貼出與倪晨曦的撞樣照，網民驚嘆極似樣，湯洛雯笑說：「我哋識咗好耐，第一次見到佢覺得驚為天人，畀人話似佢都好開心！有時睇ig都認錯倪晨曦係自己！」
另外，洪永城以長髮「阿拉丁」造型拍攝，他笑說：「個個同事見到我都叫留長頭髮，試吓走長髮路線，但我決定唔會咁做！」又指劇集女尊男卑，希望將來開拍《少爺大聯盟》。
