綠葉王楊證樺直升機補求婚老婆感動到喊
綠葉演員楊證樺於2015年與女藝人沈可欣拉埋天窗，兩人在節目中「婚」享點滴，除了自爆對老婆的「師奶」性格情有獨鍾，又講起幾乎失去兒子的驚險事，結婚卻從未求婚的楊證樺更特別租直升機圓夢，令太太感動落淚。
由田蕊妮主持的無綫節目《1+1的深情》，每集請來圈中情侶或夫妻分享，前晚一集是無綫「綠葉王」楊證樺（Man）與沈可欣（阿沈）的愛情故事。Man早在十多年前已對阿沈一見鍾情，但促成拍拖則是在拍攝無綫劇《再戰明天》，兩人因當時住同一區，他經常開車接送女方而撻着，並在2015年結婚。曾有30多名女友的Man被阿田問到老婆與前度有何不同？他竟然稱老婆是「師奶仔」：「佢買包尿片為咗慳1蚊都肯行多半個鐘，我鍾意老婆咁！」
發燒暈倒：生離死別原來咁近！
提到最難忘的事，兩人回憶是兒子只得1歲半時突然發燒，睇完醫生但到晚上仍繼續發燒，當Man決定送BB入醫院時，兒子突然失去知覺並在太太身邊暈倒，嚇到她淚流滿面：「以為BB走咗（離世），仲諗你嚟咗一陣就走喇……」幸好10多秒後兒子開始大聲喊，但到醫院後又突然嘴唇發紫，好彩大步檻過！整個過程時間雖短，但對他們夫婦而言已是畢生難忘，阿沈說：「生離死別原來咁近！」經歷過後才真正明白「珍惜」的重要！
手執鮮花跪地 兄弟團打氣
由註冊、擺酒到生仔，Man原來一直沒有向阿沈求婚，所以拍攝當日特別找來兄弟團包括楊明、黃建東等及姊妹團，Book了直升機向阿沈補求婚，彌補遺憾！穿上婚紗的阿沈蒙着眼去到求婚地點，當除開眼罩時一臉難以置信並笑說：「我講吓o架咋！」豈料Man手執鮮花跪地求婚，阿沈高呼：「我願意！」並感動落淚，連觀眾都嗌感動！
文：影視組