混血女星Maggie Q接受雜誌訪問時大談愛情觀，承認以往拍拖時太過自我中心，對於多位前男友，包括影星吳彥祖等感到抱歉。此外，她更示範高難度瑜伽動作，大晒柔軟筋骨。
38歲的荷里活女星Maggie Q過往曾先後與男神吳彥祖、影星Justin Long、《火拼時速》（Rush Hour）著名導演兼監製畢特烈納（Brett Ratner）及混血韓星Daniel Henney拍拖，及至2014年底與56歲的男演員狄倫麥德（Dylan McDermott）訂婚。
Maggie近日接受雜誌《Health》訪問時，剖白過往的愛情觀，自言好對唔住前度男友，承認拍拖時太自我中心：「好感謝主，我唔再係多年前咁。我對多位前度感到抱歉，因為我太自我中心，當時只係識得諗點樣去搏殺。佢哋（前度男友）盡力咁去嘗試，但仍難以親近我。我好愛佢哋，只係我唔識去表達。」她又晒大腿近臀部的鳳凰紋身，相當性感！
Maggie Q透露以前較重視自由、獨立，唔願依靠男人，亦未準備好向另一半許下承諾：「當時係想同我愛嘅男人結婚，而唔係我需要嘅男人結婚，我想實現所有目標後，可以向另一半講：『我揀你，但我唔需要你，我有能力照顧自己！』」但後來Maggie明白到一段關係中互相依靠，有助加強親密關係的連結，更重要的是要自己參與其中來建立關係。
另一方面，Maggie Q談起未婚夫狄倫，她大讚「未來奶奶」Eve Ensler：「Eve係女權及人權分子，佢仲寫咗篇話劇《陰道獨白》（The Vagina Monologues），多年前已經為女性爭取權益，早過『＃Me Too』運動興起，Eve亦啟發咗我好多。」
此外，Maggie Q更示範高難度瑜伽動作，她分享道：「好多瑜伽課堂係健身形式，但我學嘅Katonah瑜伽會深入咁教埋擺姿勢的原因、好處及如何運用姿勢去轉化身體同生活。」她又指Katonah瑜伽相信一個人的身體會影響情緒和感受。
Maggie Q未到荷里活搵食前，曾在香港影壇走紅，早於2000年開始已拍過多部港產片，大部分以動作片為主，包括《特警新人類2》、《赤裸特工》及《三國志見龍卸甲》等。Maggie最近受訪時，亦有提及被成龍發掘時的經過：「當時成龍有間經理人公司，搵緊年輕嘅演員為新一代動作片受訓。佢揀咗幾個男仔，而我就係唯一一個女仔。成龍有一隊武術專家，要經歷數月嚴格訓練。」所以對Maggie Q來說，成龍絕對可以話是恩師！
文：外娛組