扁臉歌女 人前人後兩個樣！嘴藐藐擺阿姐款

娛樂圈好多星都係雙面人，啲嘴臉變得快過四川啲變臉大師，好似扁臉歌女依家梗係紅啦，佢細細個就出道，人前人後都氹得人好開心，大家都讚佢好Nice，覺得佢有義氣，就算依家紅咗都冇擺架子，不過佢都係睇人(口架)咋！對啲唔多熟、生面口嘅行內人，就即刻擺阿姐款，有次有媒體搵佢幫手拍段片，佢擺明唔多願意，先搵藉口要錄音喎，轉頭先拍，人哋特登等佢錄完音先拍，佢一副不情願，仲要嘴藐藐，拿起支咪唧都唔笑，是是但但，求求其其噏咗兩句就好Hea遞番支咪畀人，激到個主播紮紮跳，因為段片擺明唔用得，佢錄咗等於白費，所以好多時啲星表面有幾個唔同樣。