王卓淇打機抗抑鬱課金溝仔

王卓淇（Erin）參選2014年香港小姐獲得亞軍後，加入無綫拍劇，對比同屆港姐，算是有較多的幕前機會，Erin對此亦坦言感覺像夢一場，她說：「係一個好真實嘅夢，入呢行其實唔簡單，都係一個緣分。由細到大都咁鍾意睇電視劇，自己依家可以有份拍，真係好開心，而且一直都有少少進步，好多前輩又肯教我，希望可以試多啲唔同角色。」

人工全數上繳媽咪

一直被外界定型為隱形富家女的Erin，雖然家中沒有經濟壓力，但她自言絕不揮霍，應使得使，她說：「女仔啲衫同埋裙都貴，我成日隔一排，等大家唔記得我着過，就再拎出嚟着，做藝人唔代表啲衫只可以着一次。（畀到家用？）我全部錢都係畀媽咪管，媽咪每個月都會畀零用錢我，我買啲咩之前都會同媽咪講，要得佢批准。」

雖然演藝之路一帆風順，但Erin早前在社交網表示曾患抑鬱，因當時拍劇集《全職沒女》擔重戲份，令Erin感到甚大壓力，幸好最後能渡過難關，她說：「嗰陣擔心自己做得唔好，自己有時喺屋企喊，又會問媽咪我係咪做得唔好。媽咪見到安慰我，話都要成長嘅，之後多啲研究劇本，多啲問監製，最後都完成到，覺得都滿意。嗰陣有輕微抑鬱，唔想出門口，所以留喺屋企打機，識到班打機嘅朋友，同佢哋日打夜打，最後就冇事。」

王卓淇（右起）近日與馮盈盈及楊明合拍熱播劇《果欄中的江湖大嫂》。	王卓淇每月都會問媽咪拎零用錢，買嘢亦會先得媽咪批准，可謂名副其實的嬌嬌女。	王卓淇與林泳淘同為「電玩迷」。

使千幾蚊玩戀愛game

打機打走抑鬱的Erin，近日殺出一條新血路，與無綫其他藝人如林泳淘等組成女子電競隊，建立另一個「打女」形象！Erin坦言自細就鍾意打機，更自爆為遊戲中的「男人」花費過千元，她說：「依家鍾意打競技同埋戀愛養成遊戲，近排有個戀愛養成遊戲我超鍾意玩，入面有四個男仔，我可以追佢哋，我仲課咗好多金，畀男人呃錢！課咗千幾蚊，應該會再課，因為要開通咗卡先可以有劇情，所以有排儲！」除了課金，Erin更為了打機不理儀容，試過三日唔洗頭，她說：「因為嗰幾日冇出過街，只係留喺屋企打機，試過兩三日冇洗頭，最後我頂唔順要去洗頭！」

王卓淇拍《全職沒女》時，因戲份重而壓力大。	王卓淇在《全職沒女》中與謝東閔演情侶，有不少對手戲。	王卓淇與一眾無綫藝人組成女子電競隊，打機打出一片天！

文：林倩怡

攝：司徒國榮

場地：浜燒き

鳴謝：Barry@relaxdearhk