為個唱操到見暈 Gin Lee：忍口辛苦過做Gym！

忙於為6月23日首個紅館《Gin Lee First Of All》演唱會操練的Gin Lee（李幸倪），雖然距離開騷還有一段日子，但她坦言不敢鬆懈，本身有玩瑜伽的她，更特別找健身教練狂操：「瑜伽係靜態，但依家我要爆汗，所以要做Gym，一個星期我操五至六日，每次練兩個鐘，又要練舞，所以真係好忙！」經過兩、三星期操練，Gin笑言已有少少成果：「好多朋友都話我弗咗。（有馬甲線？）未有，畀多少少時間我，開始感受到腹肌線條，因為腹部好硬，但仲有脂肪要減。」

日日磅重勁心急

Gin自爆特別買了部專業測量體重機，笑說：「我日日都磅重，好心急，其實暫時變化未係好大。」她表示操練過程好辛苦，加上她本身血壓低，最初玩健身時更經常頭暈：「教練都話我好敏感，上壓去到140就見暈，要停低休息。」除了健身操練，她坦言未有戒口：「千祈唔好唔食嘢！因為我要操，更加要食，否則可能有反效果，反而每晚七點後唔食嘢係最難，因為有時夜收工真係好肚餓，最多食個生果、乳酪，真係餓住瞓！忍口比做Gym更辛苦。」

Gin Lee今次下定決心要操弗自己。	成班粉絲等睇你個騷，撐住呀Gin Lee！	Gin Lee預告會在個唱表演勁歌熱舞，大家拭目以待！

希望有加場機會

Gin預告會在演唱會表演勁歌熱舞，雖然不是跳舞出身，但她自言好鍾意跳舞：「排舞老師都話我有天分，我自己都覺得OK嘅，節奏唔錯，不過底子同技巧要練，跳住唱係會喘氣，我想操到好自如。」唱功了得的她坦承有刻意在歌曲編排方面作高難度表演，希望帶給觀眾驚喜。而其個唱公開發售後，反應不俗，令她很開心，更表示希望有加場機會：「如果得一場會唔開心，籌備咁耐，做一場好似發夢咁，肯定會好失落。」

文：音樂組