黃心穎患感冒馬國明4am陪夜診
黃心穎昨日拍攝新劇時透露連續多日趕戲，太操勞下「打敗仗」患感冒，幸好獲男友馬國明照顧，就算凌晨4時仍陪她睇醫生，難怪她冧爆說：「佢的確好關心我！」
洪永城（Tony）、黃心穎、湯洛雯（靚湯）與謝東閔等昨日在將軍澳電視城拍攝新劇《丫鬟大聯盟》，心穎表示劇集還有兩星期便煞科，靚湯則透露拍多五日，稍後便到內地拍攝另一劇集《包青天再起風雲》。
洪永城讚捱得
心穎日前於社交網站透露患上感冒，她表示拍攝兩個多月來只休息了一日半，身旁的靚湯則坦言是她先發燒，叫醫生開重感冒藥，但之後便輪到心穎患感冒。問到有否因而「冧廠」，心穎笑說：「咁又冇，甩咗半日外景啫！個個同事都畀喉糖我食。」問到男友馬國明可有貼心照顧，她冧笑說：「佢的確好關心我，凌晨4點陪我去睇醫生。（有冇煲湯水畀你飲？）咁又冇。」
同場的Tony亦指心穎拍攝檔期緊密，讚對方非常捱得：「佢有時病得太犀利要返屋企休息吓，但佢喺現場都仲好有活力。」他又表示拍《丫》劇後會休息兩至三星期，問到可會趁放假外出旅行？他指早前朋友聚會甩底，希望食飯補數。至於可會約前女友唐詩詠？Tony透露對方忙於拍攝《白色強人》，自己亦於5月中開新劇，與朱晨麗做夫婦：「我都要郁動吓，做番多啲運動。」
文：影視組