天后Katy Perry向來言行出位，日前為歌唱比賽真人騷擔任評判，卻被指「太溫和」不及前任評判Simon Cowell般刻薄，未知Katy是否想以另類方式「出位」，竟於節目上公然奪走19歲男參賽者的初吻，因而被網友鬧爆！
33歲美國樂壇天后Katy Perry早前因買修道院惹糾紛，而她起訴的修女在庭上暴斃，該修女生前曾直言不滿Katy的反叛作風。是非多多的她，近日再有出位行徑！近期Katy為歌唱比賽真人騷《一夜成名》（American Idol）擔任評判，日前播出的一集中，Katy的評判拍檔Luke Bryan以Katy名曲《I Kissed A Girl》歌詞，問19歲男參賽者Benjamin Glaze有冇錫過女仔，他即表示未談過戀愛，只想拍拖後才親吻。
之後Katy邀請他上前吻自己的面珠，但嫌對方沒有錫到「啜」一聲，安哥再錫時，Katy卻突然嘴對嘴錫Benjamin！被奪初吻的Benjamin一臉驚訝，當場蹲下。
事後Benjamin受訪時承認感覺並不好：「我來自保守家庭，所以有少少唔舒服，我想留番（初吻）畀初戀，同想（初吻）係特別嘅。」
不少網友以「＃Me Too」標籤鬧爆Katy強吻Benjamin，行為與性騷擾無異，事件亦掀起外界爭議。Benjamin即在社交網Instagram留言維護Katy：「我唔覺得被Katy性騷擾，覺得唔舒服係因為從未錫過，當時冇預期過會被錫。」
文：外娛組