范振鋒妒忌李思欣好戲拒夫妻檔演出
藝人元華、曾江、范振鋒與太太李思欣，前晚到奧海城出席電影《唐人街探案2》優先場。現為天泰娛樂文化董事總經理的李思欣升呢電影發行商，她笑說：「呢個名銜好大壓力，電影對自己嚟講係個好新嘅範疇，老公經驗比我更加豐富。（公司有咩大計？）之前投資過一啲電影、演唱會，今年會開兩套戲。」
問到可會夫妻檔演出？范振鋒耍手擰頭笑說：「唔好喇，好怪，之前都有人搵過，不過我都推咗。（驚有拗撬？）唔係，自己又唔係做開戲，佢又係學院派，我唔想吓吓畀佢教，都係分開吓好啲，佢啲電影我幫佢做司儀囉。（唔收酬勞？）收，收平啲。」
曾江元華最怕坐飛機
至於多年冇合作的元華與曾江，大嘆今次沒對手戲。元華笑言在片中開拳館授徒，但較少有動作場面：「坐飛機同時差最辛苦，拍咗四日戲，我都提早去適應時差。」曾江則演唐人街教父，笑言拍得很舒服，因角色是坐輪椅：「唔舒服我都唔拍啦，最辛苦反而係坐飛機，原本直飛紐約，但係飛機話冇水要維修，停完東京再停三藩市先去到紐約，搞到Delay咗十個鐘。」片尾中，兩人與台前幕後扭腰跳舞，大讚好玩，曾江說：「跳舞梗係搵阿修（胡楓），但最緊要開心。」
文：影視組