何傲兒轉攻內地恨過神仙癮

港姐出身的何傲兒在劇集《波士早晨》中，飾演李佳芯的孖生姊妹「金鳳」，皮膚黑黃又哨牙，劇集早前播出令網民「驚為天人」，指其造型醜到噴飯但演技討喜。其實該劇是Lily在無綫的最後一套作品，離開兩年半間，Lily獲不少工作機會，去年更返內地拍劇及網絡電影：「我都好掛住喺TVB嘅時刻，大家都好有愛！但依家個人獨立咗，見識多咗，好開心可以繼續拍戲。」

髮型師都溫劇本

Lily早前與內地花旦唐嫣合拍內地劇，更到美國拍外景，她指劇組台前幕後都非常專業認真，連髮型師都看了四次劇本，令她也不敢怠慢。問到離港工作會否不適應？Lily說：「開頭都驚，因為得我一個香港女仔，但好彩中間有時間可以返吓香港，係少咗時間同家人、Fans見面，所以會喺網上開多啲Live。（最大挑戰係咩？）要我親自講普通話原聲，冇得配音，不過角色係香港人，導演容許我有啲香港口音。（仲想試咩劇種？）希望拍古裝宮廷戲，我鍾意彈古箏，有時都覺得自己係古代人。另外仲想拍神仙劇，成日睇書都會幻想自己係仙女咁。」單身的她自言經常要離港工作，冇時間跟追求者約會，但直言抱開放態度，隨時Ready拍拖，目標35歲結婚。

Lily感激無綫栽培但亦無悔離巢，直言現時見識更廣。	以普通話拍攝內地劇的Lily，笑言是一大挑戰。	Lily早前到美國拍外景，大晒白滑長腿。

豁出去扮醜

提到《波》劇的醜女角色獲讚，Lily直言開心得到網友鼓勵，現在看到自己演出亦覺得很搞笑：「我睇劇本已經不停笑，諗點樣令演繹更Funny，好多人以為我會有顧忌，但其實扮醜係最冇顧忌，拍嗰陣冇補過妝，盡力將大癲大肺呢種特質釋放出嚟。」

場地：Goobne Chicken

鳴謝：Barry＠relaxdearhk

髮型：Dave Wong＠IL COLPO Platinum

服裝：MZJJ

文：影視組　

攝：吳文聰