鄧穎芝特訓殘障勇士挑戰障礙賽

鄧穎芝最近義教一位天生得一隻腳的殘障人士蘇慈悅（Christine），她說：「初初我想推嘅，因為難度好高，但我做健身教練係想感染人做運動，佢得一隻腳都勇於接受挑戰，我覺得好值得幫佢，仲好有意義，佢感染力大過我，其他人仲有咩藉口唔去做運動！」Christine將於4月在港參加障礙賽，此賽事Vangie參加過兩年，希望藉個人經驗幫助對方應用到比賽上。

操線條 幫得手

由操練到比賽僅得兩個月時間，Vangie坦言要為Christine進行極速地獄式訓練，從未教過學生的她特別為Christine的身體需要制訂一套訓練課程：「每次同佢上堂我都要做定功課。」經過兩、三個星期操練，Christine表示Vangie好嚴格，雖然辛苦但好有效：「我覺得自己線條同肌肉有改善，有好多動作我都係第一次做，Vangie實諗辦法幫我做到，我覺得佢好靈活，好似我做sit up好難平衡，但佢會用儀器幫我做到。」

鄧穎芝義教天生得一隻腳的殘障人士蘇慈悅。

鄧穎芝落力特訓蘇慈悅，將在港出戰障礙賽。

學會點樣教人

Christine曾經參加過十公里長跑，在兩小時內完成，Vangie大讚她犀利：「障礙賽比十公里跑步難好多，要擒高擒低、爬鐵架、泥漿、搬沙包，身體健全有兩隻腳但冇做開運動嘅，都未必完成到，所以我好佩服佢！」Christine是首個殘障人士參加這個障礙賽，大會想跟她詳談了解有甚麼地方可以幫忙，Vangie說：「障礙賽係冇時間限制，能夠完成已經好叻，當日我會去陪佢。」Vangie坦言今次義教獲益良多：「多謝佢做我白老鼠，我都學到點樣去調校訓練嘅強度去教人。」

文：音樂組

攝：劉智源

場地：Goji Studios