湯洛雯羅天宇分手護陳瀅：唔牽涉其他人
無綫藝員湯洛雯和羅天宇因合作處境劇《愛．回家》成為情侶，去年10月羅天宇生日，湯洛雯更大方送吻，本以為兩人打風都打唔甩，豈料昨日就突然爆出分訊，四年情玩完，更有指羅天宇與陳瀅極速撻着！兩人強調是和平分手，不牽涉第三者。
湯洛雯（靚湯）與陳瀅昨日剛巧同樣在將軍澳電視城開工，湯洛雯拍攝劇集《丫鬟大聯盟》，心情不俗，似乎未受情變影響，她說：「已經3、4個月，發展耐咗都係覺得做朋友會舒服啲，所以選擇做番朋友。（有拗撬？）唔係，我哋會討論，但唔會激動咁嗌交，但係一齊始終需要磨合。（相處有分歧？）想留番喺心裏面保留私隱，總之唔牽涉到其他人。（外間睇好你哋結婚？）事業啱啱起步，真係未諗過結婚問題。大家相處有開心過，會好好珍惜相處嘅回憶。（有冇轉機？）都係有問題先行呢一步，機會唔大。（邊個提出分手？）雙方提出，大家坐低傾。發展咗之後，反而冇以前了解緊嘅時候咁開心，所以選擇分開。有傾過、挽救過，但係淨係傾係解決唔到問題，所以都係Let Go會舒服啲。」並力撐好友陳瀅不是第三者。而她早於2月已在網上留言表示「Let it go」，似乎是暗示分手。
強調冇撐枱腳
至於陳瀅為另一劇集《危城First Lady》開工，她否認撻着羅天宇：「兩個都係我朋友，不滿（報道）啦梗係，好無辜！頭先喺化妝間見到靚湯，都有同佢講番呢件事。（佢信唔信你？）點解唔信？自己單身係好容易畀人寫成Target，試過幾次咁樣畀人寫，成隻死貓質畀我食，我都已經食到飽！」
而羅天宇以短訊回覆承認分手，指他與湯洛雯因生活上的問題已分開約四個月，雙方是和平分開，又自覺拖累了陳瀅。他澄清報道，表示當日在大牌檔共有七位朋友一齊食飯，並不是只有他和陳瀅撐枱腳。另外，黃心穎與湯洛雯齊齊開工，她大讚拍檔專業，未受情變影響工作，亦不覺她有異。
文：影視組