24歲丹麥索模Josephine Skriver不時大晒噴血性感照，她除了有魔鬼身材，亦有內在美。Josephine的父母同為同性戀者，她成名後大方分享獨特的家庭背景，為LGBT社群平權發聲，成為模界新貴！
18歲入行的Josephine在丹麥出生，天使外貌與魔鬼身材固然搶鏡，而其父母的性取向亦是外界焦點所在！Josephine的媽媽是一名IT分析員，爸爸則是海洋生物學家，她曾在訪問中透露：「阿媽賣廣告話自己係同性戀者，想要一個同志男性，一齊組織一個非傳統家庭！」其父母最後透過人工受孕方法，誕下她與弟弟Oliver。
Josephine自爆因家庭背景「特別」，小時候經常被嘲笑，但她卻因此愈來愈強：「與兩個同志父母成長，令我更加外向，而且心態開放。我4歲已經拉父母去同志遊行，因為我想大大聲驕傲地呼叫！」她憑着自信走上天橋，至今已為不同的國際品牌行過逾300場騷，更是內衣品牌Victoria's Secret的王牌天使之一，成為一線模特兒！
Josephine成名後不忘初心，繼續在自家平台勇敢為LGBT社群爭取平權，她曾發文表示：「大家見到我係人工受孕嘅人，我希望佢哋見到一個同其他人一樣嘅人，好多人話『佢唔係自然而嚟嘅，佢唔應該嚟呢度。』但我唔係科學實驗，我唔係『人造』產物，我係好似你一樣咁真實！」雖然平權言行不時惹爭議，但Josephine仍然堅持信念：「愈多人想鬧我，我就愈想帶佢哋飲咖啡，坐低傾吓偈，因為我衷心認為你知多啲，一切都會好啲！」
雖然升呢成為人氣模，但Josephine保持零緋聞，已有一個拍拖4年的歌手男友Alex DeLeon，對方是美國搖滾樂隊The Cab主音。兩人不時在社交網晒合照放閃，Josephine最近上載多張與Alex的恩愛合照慶祝拍拖周年，當中不乏攬啜靚相，她更公然留言放閃：「我唔敢相信我搵到一個集我嘅家庭與經歷於一身嘅人！你係我相信童話故事係真嘅原因！愛你！」連粉絲都感受到甜蜜，狂派心心！
文：外娛組