現年24歲的英國男子組合One Direction（1D）成員Liam Payne與34歲歌手Cheryl日前傳情變，然而不但未見男方搵女友箍煲，他更被拍到與新歌拍檔兼性感天后Rita Ora出席派對狂歡，難怪粉絲懷疑兩人撻着！
Liam與Rita上月推出為情慾賣座電影《格雷的五十道色戒3》（Fifty Shades Freed）合唱的主題曲《For You》後，密密合體宣傳，雖然男方日前被爆與為他誕下一子Bear的歌手Cheryl情變，可是Liam不但未停工「救亡」，大前晚更被拍到風騷現身英國影視藝術文化學院（BAFTA）電影頒獎禮慶功P，同場有着到彩雀一樣的Rita，令粉絲懷疑二人撻着令Liam與Cheryl鬧分手，有粉絲更在社交網留言：「Liam究竟係同Cheryl拍拖定係Rita Ora？」另一粉絲就指：「其實最令我不安嘅係Liam同Rita成日喺埋一齊。究竟Cheryl同個BB喺邊？」有指Liam在派對中亦與不少模特兒搭膊交流，似乎未受情變傳聞影響心情。
至於他前日上節目時亦未提及鬧分手一事，僅僅講到與Cheryl為B仔支持邊隊足球隊而爭論，期間搞笑扮Cheryl把聲！據悉Cheryl一直不想Liam公開家事，令囝囝的生活曝光，不過初為人父的Liam毫不避忌。另有傳二人分手全因男方多次求婚失敗，眾說紛紜。而Cheryl將上節目宣傳基金工作，Liam昨日亦宣布將與Rita在英國音樂獎同台演出，未知會否回應掟煲傳聞？
此外，1D另一成員Niall Horan日前被粉絲捕獲於賭城睇美國男子組合Backstreet Boys開騷，身邊還有人氣影星希莉辛菲（Hailee Steinfeld），二人於貴賓區與友人睇騷，粉絲就拍到他們排排企跳舞唱歌，因而傳撻着。據知Niall與希莉騷後直落夜蒲，知情者說：「佢（希莉）唔積極追求任何嘢，Niall就好冧佢，但佢（希莉）唔肯定係咪想再投入戀愛。佢哋識咗好耐，彼此亦好自在，但暫時未係好認真住。」
文：外娛組