王馨平承傳美德向長輩跪地叩頭
歌手王馨平日前首次在紅館過農曆新年，為黎小田的演唱會任嘉賓，她笑言叫黎小田安排她較早出場，方便(手豆)觀眾的利是，問到可想舉行個人演唱會？她說：「希望快啲有機會，未申請到，不過今年冇乜機會，遲啲都好，可以多啲時間籌備。自己一路有好多Idea，希望做一場好靚、感動全場觀眾嘅演唱會，希望每個人都有得着，令人記憶猶新。」早前在周慧敏演唱會以美少女戰士造型亮相，王馨平坦言從未作如此打扮，當是給自己的回憶，難得老公也讚造型「好正」！
閉關300粒鐘練瑜伽
一向孝順尊敬長輩的王馨平，新年習俗是向長輩行三跪叩禮：「年初一會向老爺、奶奶跪地叩三個頭，老爺、奶奶好西化，成日話唔使跪叩，90幾歲嘅嫲嫲都有叫我唔使叩頭，但由細到大睇到爸爸（王羽）向嫲嫲跪叩，自細就跟住做，唔畀我做會唔慣。」她指餐桌上習慣要等長輩先動筷，希望好好傳承傳統禮節，又以姨甥女為例：「我妹兩個女，16、17歲，有時對佢媽咪講嘢冇禮貌，唔耐煩，我妹未出聲，我已經出咗聲，好彩佢哋都會聽話。其實我好錫佢哋，佢哋住加拿大，有年我去美國做嘢，中間飛加拿大探佢哋，因為少少誤會行李上唔到機，我寧願將行李交低畀助手處理，我自己手提送畀佢哋嘅禮物上機。」
王馨平修練瑜伽多年，身材愈來愈Fit，但她覺得最大得益是情緒平靜：「今年會再進修300個鐘瑜伽，充實自己，3月、6月和9月，每個月平均會閉關100個小時，每次做瑜伽之前，都要做3個鐘體能，係好辛苦，如果今年唔做就冇毅力去做。」
文：Tracy Leung
攝：劉智源
髮型：Jacky＠il Colpo
化妝：Bon Bon＠modmakeupAcademy
服裝：yi-ming
場地：Mott 32