張秀文嚴選「新抱」狗女爭住交配
無綫咪神張秀文去年養狗榮升「媽媽」，因愛犬「太郎」實在太可愛，不少狗友都帶埋狗女想跟「太郎」交配，望誕下一堆狗仔狗女，秀文笑言新年願望是盡快做「奶奶」及「嫲嫲」，超級搞笑！
擁有驕人身材的張秀文身穿紅色低胸裝，趁新正頭品嘗牛豬雜錦鍋、藥膳雞鍋及刺身拼盆，又親自炮製甜品椰汁糕，祝願大家全年豐衣足食、步步高陞！秀文帶埋9個月大的柴犬「太郎」一齊影賀年相及開餐，太郎見到鏡頭時不停笑口噬噬，非常可愛！
秀文表示去年最大轉變是飼養了太郎，升呢「媽媽」後生活更開心，笑言新年願望是榮升「奶奶」甚至「嫲嫲」：「好多有養狗嘅朋友讚太郎可愛，都想太郎做爸爸，帶隻狗女嚟想佢哋交配，希望要佢哋嘅BB。（想幫太郎揀隻咩狗女做老婆？）首先唔想要啡色，因為太郎黑色，上網睇黑啡生出嚟係啡色頭黑色身，好似被整蠱，長期除唔到件黑色衫咁！」
一時衝動結婚造人
秀文直言做「媽媽」後責任感大增，每日想盡快返家：「仲會Check住狗仔啲便便，見佢有健康便便就好開心！」問秀文何時真的做媽媽？她笑言沒想過：「我個人唔係太有計劃，可能一時衝動都唔出奇，可能我係全家最細，冇話好想孭起個家庭，依家更加知做媽咪唔易呀！」她笑言今年不用買桃花轉運，因太郎已是她最大的桃花，令她認識不少狗友，跟鄰舍關係更好。事業方面，去年秀文多了拍劇機會，曾參與一套大製作網劇，跟多位好戲之人合作，希望新一年可演繹更多不同角色。
超標狂食獲利回吐
為食的秀文直言每年新年都狂食各式糕點，最近主持飲食節目更超標狂食，結果搞到消化不良：「有日食好多海鮮、炒米粉，跟住仲拍『掃街』，撞到個鄉里賣燒賣、粉果，又幫襯咗唔少，結果消化不良，第二日嘔黃膽水，新一年飲食要節制，而且身材都要Keep住，每大一年都易肥咗！開始有壓力，要做番多啲運動。」
文：影視組
攝：劉斌