泳兒詐傻推莊 爆洪卓立閃婚沖喜
踏入狗年，歌手泳兒率領鍾舒漫（Sherman）、洪卓立（Ken）和吳浩康（Deep）約埋一班醒目「汪星人」，實行「狗狗震」賀新年！自稱養狗經驗豐富的四人即場餵狗又同牠們玩，可惜狗狗似乎「唔畀面」，不但愈叫愈走和不受控，最後四人更手忙腳亂弄翻狗糧，場面相當惹笑！
問到如何度過農曆新年？泳兒透露計劃往美國做騷，父親是印尼華僑的Sherman表示最開心可以大擦美食：「爸爸會煮好多過年先有嘅印尼菜式，例如千層糕、巴東牛肉同黃薑雞。」Deep就自認衰仔：「我會扮未瞓醒起唔到身，點爸爸幫手煎糕，所以佢每逢新年都唔係好想見到我！」
新年想增肥
俗語有云「一喜擋三災」，問今年犯太歲的泳兒有否打算趁機和圈外男友拉埋天窗？她即詐傻說：「係咩？喜事呀，食餐飯都可以係喜事。通常成日講就未必係嘅，唔講嗰啲就可能係喇，可能係Ken呢！」Ken笑說：「講係冇用，要知道有樣嘢叫閃婚，係冇辦法預知。」談到新年願望，細細粒的泳兒竟然話想增肥：「想食番肥少少，大約1、2公斤左右，希望身形更弗、更健康。」
攝：吳文聰
場地：On Dog Dog Cafe