同懷第二胎 JC Ana R.口味夾孕育辣B

JC與Ana R.分別育有一女，兩個囡囡的年齡僅差四個月，今次她們不約而同懷第二胎，認真巧合。日前二人齊穿旗袍，帶埋愛犬拍照賀新年。Ana透露狗狗叫Gucci，而且三隻愛犬都與囡囡相處融洽，所以好熱鬧。JC抱着嬌小的Charile，透露牠已八歲，個性十分怕醜。她們都對小動物愛護有加，表明一養就會照顧牠們一生一世。

玩「肚撞肚」

Ana懷孕四個多月，但其孕肚明顯比懷孕五個多月的JC大，兩人不時互摸孕肚兼玩「肚撞肚」，相當有趣。JC表示得知Ana懷孕時超級開心：「難以置信，因為係我通知佢懷孕先，點知隔三星期佢就話畀我聽佢都有咗，好開心同好朋友一齊大肚。」Ana得悉JC懷孕後，心血來潮自行驗孕，她說：「點知真係有咗，我哋對上一胎相差四個月，真係好啱。」

JC抱着怕醜愛犬Charile咀嘴。

二人透露經常相約食炸雞同辣嘢。

唔怕身形走樣

二人不時互通電話及相約飯敍，Ana說：「我哋一齊狂食炸雞同辣嘢，大家口味一樣，好易決定到食乜。」JC插嘴道：「但好危險，完全冇控制食物。（唔驚太肥？）今次同第一胎唔同，之前只係食同瞓，但依家有個女兒，每日要照顧佢，消耗好多能量。」問到她們的女兒會否呷醋？二人異口同聲表示暫時沒有，笑言可能還未識呷醋，Ana說：「囡囡成日摸我個肚，佢知有啲嘢喺我個肚入面，成日想推佢出嚟。」JC則表示經常告訴囡囡將會做家姐：「BB出世後，佢應該會妒忌。」問到會否做全職媽咪？二人表示會以家庭為主，但仍會繼續模特兒工作，好好分配時間，JC說：「依家有時出街都只係幾個鐘，之後趕返去湊囡囡。」

文：名人組

場地：Royal Catering Hong Kong

服裝：Yi-Ming