唐詩詠吉星高照 幫王浩信招財
出爐視帝王浩信和視后唐詩詠去年鴻運當頭，賺得盆滿缽滿之餘仲勁攞獎！不過，浩信卻指狗年「夠用就得」，不想特別加人工，搞到詩詠睇唔過眼化身「絕世好老友」，自封吉星，開聲為拍檔謀福利，希望對方年年加人工：「你仲有個女！」
藝人王浩信和唐詩詠在剛過去的雞年事業大豐收，不但合作主演的無綫劇《不懂撒嬌的女人》大受觀眾歡迎，年尾更在台慶頒獎禮攜手獲得視帝、視后殊榮，可謂鴻運當頭！為Keep住旺爆運勢，詩詠一踏入狗年即向人夫拍檔浩信(扌豆)利是，討個好意頭！問會否想新一年加人工？往年接Job接到手軟的浩信就非常知足：「夠用就得！」詩詠聞言即由「絕世好女友」化身成「絕世好老友」，開聲為拍檔謀福利：「你有個女喎，每年都要加！」亦希望對方可以身體健康，認真抵錫！
期望明年有拖拍
提到詩詠屬雞，在過去的本命年犯太歲，今年又欠缺吉星拱照，她即安慰所有肖雞之人：「我去年都唔錯吖！同埋今年大家可以多啲去吓紅磡、觀塘等東九龍近海地方，會有幫助！其實我屋企都有兩個吉星，就係我兩隻貓，佢哋都識招財！（搵洪永城做埋你吉星？）其實我都可能係吉星嚟，我啲拍檔依家都幾好！（想唔想拍拖？）今年狗年冇o架喇！期望再下一年有啦！」
最緊要囡囡開心
至於浩信就因為屬豬有「太陽」吉星照住，所以有較多男性貴人，問會否覺得要黐多點男人來避緋聞？他就指不會再在意相關報道：「最緊要係囡囡開心。（會唔會趕工生狗B？）呢啲隨緣啦，我係好鍾意小朋友嘅！」而他們又指想與對方繼續合作，在演藝上再度擦出火花，讓觀眾繼續感動，浩信更說：「獎項唔係最緊要！」
文：影視組
攝：吳文聰
服裝：Sparkleconcept（唐詩詠）、Brooks Brothers（王浩信）