甘嘉拉圖寸莎拉虛偽：你唔係我朋友！

有傳甘嘉拉圖與莎拉不和，令電影版《色慾都市》第三集開拍不成。早前甘嘉拉圖喪弟，莎拉於社交網留言慰問，但甘嘉拉圖不賣帳，幾日後留言寸爆對方虛偽！

轉載刻薄文章

甘嘉拉圖於Instagram留言：「喺呢個悲傷嘅時間，我唔需要你嘅支持同愛。」再標籤謝茜嘉的帳號，擺明挑機！並寫道：「我阿媽今日問我：『到底幾時莎拉謝茜嘉柏加呢個虛偽女人先肯放過你？』你（莎拉）不斷接觸我，就係痛苦地提醒我以前同現時嘅你有幾無情。等我講得非常清楚（如果我之前未講得清楚嘅話），你唔係我嘅家人，你唔係我朋友。所以我寫呢個留言，最後一次叫你停止利用我哋嘅悲劇去重建你嘅好女士角色。」更轉載有關討論《色慾》系列刻薄女性文化的文章，明寸莎拉刻薄。

甘嘉拉圖對另一個慰問她的同劇女星仙菲亞尼克遜（Cynthia Nixon）卻非常友善，多謝對方支持：「仙菲亞，聽到你嘅聲音對我真係好重要，多謝你關心，愛你嘅甘。」

文：外娛組