麥明詩太多情人戲飛唔夠分
藝人方力申、麥明詩、姜皓文、林盛斌及邵音音等，昨日到油塘宣傳英皇電影《我的情敵女婿》，麥明詩透露片中扮演MK妹，要穿魚網絲襪、戴有色隱形眼鏡及黐假眼睫毛，與現實中的她反差甚大，問到求學時期有否試過類似打扮？她笑言當年很乖，但曾經為了爭取讀書時間而扮病曠課：「唔返學留喺屋企做Past Paper，仲慳番搭車時間，我相信少壯不努力，老大徒傷悲！媽媽都知我請假係為讀書(口架)，覺得既然個女咁勤力就冇阻止。」她笑言有將絲襪Look給好友馮盈盈過目及問意見，笑指盈盈最近在節目都有分享MK往事，原來對方細細個已染金毛，是「元祖級MK妹」！
講到情人節有甚麼節目，麥明詩表示要出席電影首映，問到會否攜眷亮相？她笑說：「費事（戲飛）畀得一個又畀唔到第二個，公平啲！（多人向你示愛？）間中都有嘅。」
方力申擇偶要求高
方力申則表示有30張戲票，問到是否會邀請30個情人？他說：「係叫朋友，有啲本身有拍拖，有啲單身。（當中有冇目標？）冇啦！我要求太高，工作仲好，如果唔係唔知點過，周街都係情人節套餐，我食臘味飯咋！依家做嘢可以同大家一齊食中餐！」
姜皓文「叫兩飛」喊出嚟
至於姜皓文（黑仔）在香港電影金像獎最佳男配角「叫兩飛」，他坦言意想不到，一度激動得對住太太流淚：「但佢冷靜過我，見我喊仲話『傻仔，做咩啫！』（有信心？）倉田保昭都有兩個提名，佢好戲又型格，自己仲要加把勁。（打定輸數？）又唔係嘅，但有份同佢爭獎已經當係贏咗。」
文：影視組