賣銀器做慈善 高海寧擺檔送抱男粉絲唔拘
藝人高海寧、陳展鵬、陳敏之及譚凱琪等昨日到尖沙咀出席「big big明星市集」，擺檔售賣自家產品行善。高海寧獲父母撐場，她說：「今日我哋擺檔賣銀器，檔口唔使畀租，扣除成本後會捐出嚟做慈善，我冇定想做幾多生意，做善事愈多愈好，公司今次搞市集係新嘗試，希望大家為善事買多少少！我遲吓都想設計啲銀器，想有自己條Line，希望可以實現！（今日買首飾送合照？）呢個好易啫！（加送抱抱？）都可以o架！（男粉絲蜂擁而上？）今日唔拘嘅！」
展鵬Fans捐兩萬
而展鵬率先捐出兩萬元：「唔係我捐，係我啲Fans捐，每年我生日佢哋都會做慈善，今年就將啲錢捐畀大會受惠機構血癌基金會！（之前同緋聞女友單文柔做義工？）嗰次本來係同謝雪心去，但佢唔舒服，平時我哋都做好多探訪。（情人節放假？）好似要開工，日日都可以慶祝o架啦！」他提到將會到馬來西亞會Fans：「年初二會同佢哋見面，我年初一要出發。（見面會票價要1,200港元？）其實見面會嘅形式仲商討緊，仲未定實。」
另外，陳敏之表示有留意關於流感疫苗的討論：「我個仔冇打疫苗，因為我老公認為注重衞生就得，唔想個仔接觸咁多藥，我本來約咗醫生，想偷偷帶個仔去打，但怕有乜事，老公一定鬧！其實打唔打靠家長分析，每個小朋友體質唔同，要因應環境，我會尊重老公，大前提都係想身體好啫！」
文：影視組