吳若希巴黎血拼老公自願任劏
歌手吳若希又放閃，跟闊少老公的巴黎婚照首曝光！穿上通花喱士婚紗的她和老公煙韌到暈，更爆老公當街用體溫送暖，兼任由她「生劏放血」。不過講到派利是就精打細算，力保老公荷包。
「幸福人妻」吳若希（Jinny）去年4月為澳門闊少男友Alex誕下愛女淼淼後，同年10月10日註冊結婚，之前豪花40萬到巴黎10日影婚紗相，穿上白色喱士婚紗的她幸福滿瀉，在巴黎鐵塔下和老公擁吻及擺心心甫士，就算穿上便裝，兩人也攬到實一實。
偷偷買手袋畀老婆
首次踏足巴黎的Jinny昨日受訪時，分享拍婚照的甜蜜事：「我影得一套婚紗，其他衫比較單薄，嗰度天氣都好凍，老公就全程攬住我，用佢件大褸包住我囉。」除拍照外，兩人還「食好西」和拍拖購物，提到當地名店林立，可有劏到老公「一頸血」？她晒命稱：「佢自願，任我劏o架！佢成日叫我去Shopping，我睇中啲手袋，但怕行另一間有更抵嘅，就唔買住，點知佢偷偷買咗啲我試咗好耐，但又冇買嘅袋畀我，我都多謝佢嘅。」
派利是有策略
今年是Jinny首年以人妻身份派利是，問到是否已準備豪派大利是，她笑言囡囡淼淼亦是第一年𢭃利是，會化身「精明師奶」：「我已經有策略同朋友講晒，就係我派雙封，而囡囡收番單封，但利是錢係同等，咁就唔會蝕！」
揚言今年正式回歸香港樂壇的她將搬回香港：「本來同老公『暫時分居』，但佢唔捨得我，我又唔捨得佢，所以佢會跟埋我返香港住，或者我會喺香港買個大啲嘅單位。」而囡囡就港澳兩邊走，更指她媽媽最開心可常見外孫女。另外，Jinny近日曾向朋友呻食欲不振，情緒低落，令人擔心其情緒病復發，但Jinny叫大家放心：「我冇事，只係氣管敏感，唔想食我都會照食嘢。」
文：音樂組