蔡一鳳買Elsa公仔 佗B女洩密！
名媛蔡一鳳（Michelle）與老公前亞視高層盛品儒婚後一直恨生B，本報早前獨家披露Michelle造人成功，現已懷有4個月身孕。
日前下午5時許，Michelle隻身出發赴美簽約，她在傭人陪同下現身機場，戴着黑超、穿羽絨短褸及波鞋的她，腹部圓碌碌，微微見肚，只見她間中叉腰，傭人則在旁幫忙推行李，她辦理Check In手續時，還落手落腳烏身打開行李篋執拾物件，身手十分靈活。雖然她未有透露腹中塊肉的性別，只見她逛機場玩具店時，當她看到Elsa公仔便愛不釋手，忍不住買下，似乎BB性別呼之欲出。
打消建豪宅念頭
事後聯絡Michelle，她表示赴美買地簽約：「我同拍檔喺美國比華利山買咗塊地，面積七萬呎，係我哋第一個地產投資項目，今次去簽約。本身塊地有間屋，個屋主住咗45年，人氣好足，只係間屋好細，計劃重建，預計可以起到三、四間獨立式豪宅。」由於是首個地產項目，故她親自前往打點，曾考慮過建屋給家人自住，但因附近有單位剛以2,000萬美元售出，才打消念頭做生意先，將來再覓地方建屋給家人住。
文：名人組