跆拳道考試筱靖出蠱惑

藝人筱靖前日出席拳賽揭幕活動，她自嘲資質蠢鈍，兒時學跆拳道時靠爸爸傳授作弊技巧去考試：「塊板踢極都踢唔爛，佢教我將木板浸水後曬乾會易爛啲。（會再學嚟防狼？）睇我將來男友畀唔畀，或者佢唔乖我就練番。」她又表示在內地登台試過遭抽水博懵，坦言有些老闆帶醉會搭膊頭影相：「我會覺得好熱情，但會事前同經理人講聲，到咁上下時候拉走我。」同場的模特兒楊曉穎則透露準備到上海過農曆新年，順道探望了解中的男性朋友。