黃子華落閘罷唱專責搞笑
藝人黃子華、佘詩曼及C君昨日到荃新天地宣傳新片《棟篤特工》，子華與C君合力放笑彈，C君見大會安排粉絲以女僕造型玩遊戲，竟笑說：「令我諗起第二次世界大戰嗰啲醫護人員！」子華則在旁笑說：「會唔會係第一次世界大戰先真呀？好多謝兩位朋友，令我諗起南丁格爾！」
子華示範完最在行的棟篤笑後，自爆弱項：「電影監製同導演叫我唱主題曲，我好憎唱！呢套戲嘅質素係唔應該搵我呢種人去唱，依家鄭欣宜唱，我喺旁邊搞笑就啱！（你以前有好多Hit嘅劇集主題曲？）其實我唔想唱，我覺得唱得唔好聽，冇必要都唔好唱！（出幾多錢至肯商演？）唔知，好少做呢啲，如果佘詩曼做，搵我做嘉賓，咁會考慮！（情人節有咩節目？）既然問私人問題，我就會話嗰日要團年、謝票！套戲預售反應唔錯，我依家最感興趣係新片嘅反應，我冇睇過製成品，好期待首映！」
C君計劃結婚
佘詩曼之前演出電影版《十月初五的月光》，無綫就超時補水問題向蕭定一公司作追討，問到官司進展，阿佘說：「唔知，公司同公司之間嘅嘢，我冇干涉！（冇咗TVB呢個平台幫手宣傳套戲？）我對子華嘅劇本有信心，佢同編劇組度咗兩年，嘔心瀝血！」
至於C君透露早前與女友外遊：「好開心放幾日假，返嚟日日開工！（荷包大出血？）如果好富有就去咗歐洲啦，我極其量浸溫泉！（同女友一齊浸？）佢好鍾意浸，我有浸，幾個Friend一齊浸！（預支蜜月？）未至於，不過關係穩定，同女友拍咗3年幾，我都想更進一步，Plan吓，我又唔係陸永咁唔小心！」
文：影視組