古天樂跌錶落地 尷尬執生
型男古天樂（古仔）為腕錶活動擔任嘉賓，獲大會贈送名錶，但拍照時他不慎將錶跌落地上，登時尷尬O嘴，他隨即執生大讚腕錶防撞力強。剛由韓國雪地拍完戲回港的古仔，表示置身零下20度終於感受到凍到痛的感覺！
古天樂、關楚耀與妹妹關美薇、黃愷傑、Moiselle太子爺陳栢熹等前晚出席腕錶活動，擔任嘉賓的古仔，在台上獲大會贈送名錶，當他拿着影相時，不慎將手錶跌落地，古仔來不及反應即時O嘴，隨後執生打圓場指手錶防撞力強！愛錶之人的他，收藏過百隻手錶。
貼廿幾個暖包都冇用
此外，古仔成為新一屆香港演藝人協會第13屆理事會會長，他說：「希望我可以將新動力同想法帶畀大家，幫多啲藝人。（片約咁多，有冇時間做會長？）時間係自己掌握，盡量抽多啲時間出嚟。（減產？）時間可以自己分配。」又表示剛自韓國拍完戲回港，要在零下20度雪山拍攝：「唔止凍到震，係凍到痛，終於明白暖包係要個人暖佢先會暖，我貼咗20幾個暖包都冇用。（有冇凍傷？）凍到腳板底都損晒。」至於日前他為代言的遊戲現身直播，吸引350萬網民守候，他因閃現被網民鬧爆，對此，古仔說：「不回應。」
黃愷傑單人征美緊張
趙雅芝與黃錦燊兒子黃愷傑則表示有份演出的荷里活電影3月在美國洛杉磯舉行首映，要前往當地參與宣傳，心情緊張，父母不會同行，但每逢他有作品推出，父母會跟他賽後檢討：「佢哋都係藝人，會嚴謹啲，會睇得出我邊度做得唔好。」而與妹妹關美薇同出席的關楚耀，指兄妹同屬一間公司，妹妹主要出活動同做KOL，他又大讚妹妹唱歌好聽：「我啱啱出咗新歌，想同佢有啲Featuring。（兄妹檔會分多啲酬勞畀妹妹？）冇計，我哋由細到大關係都好Close。」
文：名人組