梁諾妍-50℃凍僵險死 比賽叫停
模特兒梁諾妍正在阿拉斯加參加500公里「冰極長征」慈善跑，在零下50度的極寒低溫下，她坦言全身冰冷，手指及腳趾都沒有知覺，險些凍死，而比賽亦因太凍而暫停！
梁諾妍（Inez）前日凌晨在阿拉斯加展開為期9日的500公里「冰極長征」慈善跑，擔當領跑員的她，跟視障跑手梁小偉（Gary）及香港首位極地馬拉松大滿貫得主盧俊賢（Steve）組成三人小組出戰，由於當地氣溫只有零下幾十度，Inez做足準備工夫，事前亦特地增肥「儲脂肪」，然而賽事開始不久，於香港時間昨日竟傳來Inez險些凍死、比賽暫停的消息！
18個鐘冇瞓過
Inez透過電話表示：「我哋行咗50公里，18個鐘冇抖冇瞓，到朝早5點半紮營諗住瞓覺，但氣溫差唔多負50度，我哋喺個營度凍到瞓唔到。」休息至早上8時，她決定起身：「諗住起火煲啲熱水，點知太凍，我哋三個嘅白電油都用唔到，搞咗成個鐘乜都起唔到，手指白晒，腳趾都冇晒知覺，頸箍都冰到硬晒！」剛好有工作人員經過：「佢問我哋有冇事，仲話會攞啲白電油同爐畀我哋，但等咗三個鐘都未返嚟，我哋成身冰晒又冇熱嘢食，冇辦法下要撳求救掣，再過多一個鐘先有第二個工作人員接我哋，真係差啲凍死！」
未決定會否繼續
大會接載他們返回原本住的酒店，Inez才發現原來其他參賽者全已折返，比賽亦因天氣太寒冷而宣布全線暫停，她說：「冇人頂到，實在太凍，個比賽好似都係第一次凍到要暫停，當地咁耐都未試過咁凍！」問到會否待氣溫回升後繼續比賽？Inez表示今日開會研究後才決定：「因為暫時未知天氣會點，擔心唔夠時間完成剩低嘅路程，始終500公里好遠，如果完成唔到成個比賽，都唔叫成功做到呢件事。而且我哋11號要返嚟，因為其中一個隊友Gary之後要去京都參加馬拉松，我哋係一Team人，其中一個唔完成都唔叫係一Team人完成比賽。」
文：音樂組