山崖邊15層樓高吊吊揈城城喊驚！
藝人郭富城與羅仲謙前晚出席宣傳活動，城城難忘拍戲時，在山崖邊被吊高15層樓高，一向冇有怕的他亦直言試位時心驚驚。而謙謙則自爆與生命中最重要的女人們去旅行，即使充當人肉提款機亦心甘情願。
城城、謙謙及苑瓊丹等前晚出席「apm迎新春x《西遊記女兒國》活動」，即場與粉絲大玩遊戲，並用女兒紅祝酒，預祝電影大賣。城城更即場跳了幾下「醉舞」，炒熱現場氣氛！
談到拍攝新片經過，城城最難忘是被吊高15層樓：「呢次係我拍《西》系列電影以來，吊威吔吊得最高嘅一次。其實可能唔止15層樓高，17層都唔定，仲要喺山崖附近，嗰日嘅天氣比今日凍一倍！試位時都有少少驚，但投入咗就冇問題，風向問題拍足成朝o架，加上效果有少少唔好，我都想拍多次。」
3D巨幕搭足7日
未來一周城城將忙於到內地宣傳：「北京首映個3D巨型銀幕係特製嘅，搭足7日，我都好期待。（聽講招呼3,000觀眾，但一票難求，出現假飛同假工作證。）都明嘅，大製作，大家都想睇。我唔擔心會亂，工作人員會處理得好好。（林志玲病咗缺席宣傳？）病咗冇辦法，希望佢早日康復，可以歸隊一齊宣傳。」
謙謙樂做提款機
至於剛從澳洲黃金海岸旅遊返港的羅仲謙，心情大靚：「玩咗一星期，去咗避寒。今次係同我生命中最重要嘅女人一齊去嘅，我老婆、外母、媽媽、家姐同行，我就充當人肉提款機、司機及負責搬運行李。」他直言此行樂而忘返：「喺香港其實好少同老婆影相，今次就拍咗多條短片，遲啲上載社交平台同大家分享。（有冇太太泳裝？）冇喎，今次拍玩嘅片居多。（泳褲呢？）之前嗰條滑梯片應該見到，我赤裸上身，性感過我老婆。」
文：影視組