城城恨追仔：個天會賜畀我
天王郭富城現身apm為「開心迎狗年」任開幕嘉賓，風騷宣布年底開世界巡唱。提到狗年添丁，他心痛太太方媛產後腰痛，但深信只要當好爸爸，上天自然會有安排：「個天知道會賜畀我！」
城城昨日聯同新鴻基地產（中國）執行董事馮秀炎，到apm為巨型招財掌門狗主持招財招福的開幕儀式。心情靚爆的城城手持「旺」字揮春拍照，訪問時風騷地說：「做咗Daddy係咁喇！今年底計劃開巡迴演唱會，預計係50場先，之後繼續開，仲會接拍三部電影，預3月中、4月開拍第一部，會去美國取景，等三部拍晒就開始做巡唱。」
家庭圓滿 專心工作
問到去美國拍戲要與女兒分隔兩地必定心掛掛？城城卻說：「反而我依家更加專心工作！以前冇咁嘅心態，依家多咗一個圓滿家庭，工作可以好用心同專心，多謝家人體諒。」快將農曆新年，會否準備收爐放假？城城說：「都係！上年都好辛苦，拍咗兩部戲，其中一部《風再起時》入面角色好掙扎，因為長期投入個角色，健康都會差啲，拍完都要鬆一鬆，畀番啲時間照顧家人，而且今年過新年都唔一樣。（有妻有女好熱鬧？）今年家庭係添多咗個成員，媽媽開心，自己都好開心。（再追多個？）承你貴言。（追仔？）順其自然喇！相信天會安排，自己做好爸爸角色，個天知道，會賜畀我！」
老婆想讀時裝設計
講起工作，城城透露若有機會想發展時裝，問到會否做BB時裝？他說：「都有機會！太太都做開時裝，佢都想修讀時裝設計。」講到太太在微博呻腰痛，城城亦戥愛妻心痛：「真係做咗爸爸媽媽先知係好辛苦，做媽媽係唔容易，我會帶佢做多啲運動。（日前同太太去Shopping買鞋？）其實有啲係買畀媽媽，順便辦年貨，係18隻鞋即9對，今日都着咗對狗年限量版！」
文：音樂組
攝：秦健輝