古巨基突擊Busking 癱瘓銅鑼灣
歌手古巨基日前事先張揚會到銅鑼灣Busking，結果昨日活動未開始就已經吸引近千人駐足等待，癱瘓銅鑼灣街頭！基仔一拖十二樂手現身，當中包括一名只得5歲的小鼓手，基仔大讚對方多才多藝：「第時我跟佢搵食！」
古巨基昨日聯同太極成員Gary Tong、黃丹儀及一班樂手到銅鑼灣行人專用區演出，大會原定下午3時半開始，未到3時現場已經逼滿人群，場面墟冚！因塞車及機件問題，基仔接近4時才現身，群眾即時興奮歡呼！第一次Busking的他坦言很開心：「上面都有人，好似紅館咁，山頂同後面嘅朋友你哋好！」
他唱出《友共情》和新歌《初心》，形容樂隊陣容強大，還特別介紹初次演出的5歲小鼓手Rondi：「佢自小好鍾意打鼓，來自音樂世家，今日爺爺同爸爸都喺度演出。佢仲有喺我新歌微電影演出，多才多藝，第時我跟佢搵食，一齊做演唱會，其實佢先係今日嘅音樂總監！」基仔首度演唱由《美少女戰士》及《IQ博士》等組成的兒歌版《勁歌金曲》，直言要唱大家猜不到的歌。不少觀眾大叫Encore，基仔笑說：「你哋以為演唱會？」最後基仔與觀眾大合唱《藍天與白雲》：「今日玩得好開心，有機會再玩突發Busking，樂隊依家要返紅館幫周慧敏做演唱會，我都趕過去喇！」
自爆手汗醃壞咪
另外，基仔前晚出席無綫慈善活動，一向以手汗「聞名」的他自爆近兩年情況愈趨嚴重，早前錄影《我是歌手》和無綫《流行經典50年》時更令支咪突然失靈：「因為手汗整壞咗！（要賠？）無綫咁大方！（做手術根治？）我又唔會喎，好彩正式演出未試過。」問到太太有否投訴？基仔笑答：「不知幾Warm就真，特別舒服呀！」同場的薛家燕以低胸裝亮相，透露3月會舉行生日派對，翌日便要為兒子結婚進行過大禮儀式：「親家到時會專程由英國返嚟，忙得嚟係開心嘅，跟住就可以派喜帖喇！」
文：音樂組
攝：劉斌