謝安琪沮喪：老公心裏暗爽

謝安琪（Kay）昨日到尖沙咀出席活動，與歌迷玩遊戲及獻唱歌曲《勢不兩立》，她直言掛住粉絲，唱歌期間更走到台下握手，氹得過百粉絲非常開心，尖叫不斷。

為拜年服裝頭痛

受訪時，Kay透露正為女兒張靖準備過年服裝：「佢影相好上鏡，但真人仲係細細粒，9公斤左右，要搵咁細嘅中國服都好頭痛。（自己造？）都可以，我媽咪針黹好叻。」她形容家中氣氛因有BB而很開心，但坦言為女兒未懂叫自己而沮喪：「明明我湊最多，應該輪都輪我先，但唔知點解佢不停嗌爸爸，乜嘢都係爸爸，冇計，可能我敵不過前世情人嘅魅力，但我長線應該會得嘅。」問到老公張繼聰是否很囂張？她笑指老公不敢，因為自己真的很辛苦湊女：「佢可能叫個女嗌媽咪，但心裏暗爽咁囉。（囝囝張瞻當時叫邊個先？）我先，一人一個啦，公平嘅。」

張繼聰和謝安琪一家四口樂也融融。	謝安琪餵粉絲食嘢。	謝安琪走落台親近粉絲。

做阿聰人肉暖包

訪問期間Kay笑言緊張到流汗，其實是做了很多運動而體質變好：「今朝7點幾就做Gym，跑步、舉鐵同焗桑拿，可能因為咁好熱。」她自言以前很怕凍，現在徹底改變：「冬天唔使着好多衫都夠暖。（老公有人肉暖包？）係咪好老婆？冬暖夏涼！（成日攬住你？）係囉，幾好吖。」過年會否一家去旅行？Kay指今年比較難，因阿聰忙於拍戲：「乜都要就佢時間。（佢忙過你？）咁咪好囉！」出碟方面，Kay強調要準備一段時間：「我講定先，因為歌迷好鍾意『追殺』我，如果我話『做緊』，佢哋第日就問我。」並指麥浚龍仍在外地拍電影，雙方已傾好新碟概念，但未有時間與整個團隊傾。

此外，張繼聰在社交網晒郭富城所送的囡囡Chant滿百日的曲奇，留言問曲奇餅上的公仔樣是否正是Chant的Q版樣，又多謝城城經理人小美的悉心安排。

文：音樂組

攝：秦健輝