霆鋒出動熨斗 重現Punk頭狂揈

【關穎賢高雄直擊】相隔多年後，「型男廚神」謝霆鋒昨晚再度現身台灣高雄巨蛋演出，為《第13屆KKBOX風雲榜》擔任表演嘉賓。身為「風雲大使」的他Chok爆戴黑超，並以一頭金毛Punk頭現身，全場歡呼！霆鋒一出場已狂揈頭，唱出由觀眾投票選出的《因為愛所以愛》，然後高呼「Hello，高雄！」，並唱出新歌《異想天開》，又攞起結他唱出首本名曲《活着VIVA》。

想室外開騷：好多關要過

其後，霆鋒與司儀黃子佼談天時，被對方踢爆早兩日已到高雄綵排，騷前一晚更綵排至凌晨1時。後台訪問時，霆鋒講到髮型時笑言有直接用熨斗「撳咗兩撳」，梳此頭全因有樂手拿出2000年他做Viva巡演時的相片給他看：「覺得自己好似跨咗兩代咁！有個樂手睇騷嗰陣只得10歲，睇完就去學結他，依家佢仲做埋我嘅樂手，覺得好有意思，所以就整呢個頭。」問到可有把新歌給女友王菲聽？他即搖頭並謂不回答。講到久未開騷，霆鋒自言儲不夠歌：「我唔鍾意淨係集體回憶，希望有新作品畀大家。」他又指偏向室外開騷，至於會否今年成事？他說：「睇吓大家鍾唔鍾意嚟緊嘅歌先，我啲要求、天氣因素等等，有好多關要過。（香港第一站？）我冇所謂。」

楊丞琳被問到與男友李榮浩如何過情人節時即耍太極，自言比較重視新年。	張惠妹唱出新歌獻給亡姊，令台下歌迷感動。	安那以露腰打扮示人。

張惠妹唱歌悼亡姊

除了霆鋒外，頒獎禮還雲集多位重量級歌手表演，包括另外兩位「風雲大使」張惠妹及林俊傑、「歌神」陳奕迅、鄧紫棋（G.E.M.）、楊丞琳與盧廣仲等「風雲歌手」。阿妹首度唱出講述失去二姊之痛的新歌《身後》，而她的姨甥女安那則身穿露腰裝又唱又跳。後台受訪時，阿妹直呼表演時勁緊張，問到情人節會怎樣過？現跟圈外男友拍拖的她表示要工作：「每天有時間都是情人節！」而楊丞琳最近與歌手男友李榮浩去完英國旅行，講起咪高峰由男友送贈，問到有否回禮？她笑說：「都幾歲？還在乎節日？」

文：音樂組