鍾舒祺襟撈半途唔廢
網絡紅人成行成市，本為歌手的鍾舒祺（Sukie）就憑大癲大肺的性格出位，成為人氣的KOL。雖然Sukie外表輕狂，給予別人一種做任何事都只得三分鐘熱度的感覺，但她對事業、家人還是愛情，其實都有始有終。
誤打誤撞老師變明星
Sukie平時拍片的題材緣於日常生活，一有靈感就即去做，與家人出遊時亦拍片大玩腳軟「癱瘓」，憑無厘頭的行為，經常令到一班網民笑爆嘴。就連歌手家姐鍾舒漫（Sherman）亦與Sukie拍住上，齊齊大玩無厘頭，引起一班網民的熱烈追捧。經常被外界稱呼為鍾舒漫細妹的Sukie，其實與家姐一樣都是歌手，2009年曾參加過內地與台灣的歌唱比賽，分別獲得第二及第九名的佳績，但她強調：「並非受家姐的影響而入行，其實一切都只是誤打誤撞。」她更自爆根本沒有做明星的打算：「其實我冇諗過要行去幕前，我讀書嗰時都係想讀啲幕後嘅嘢，學吓Mixing（混音），總之係音樂類，但係學校同我講，我想學嘅嘢冇位，跟住我就去咗學唱歌。學完唱歌，其實我係想做一個老師，機緣巧合之下就去咗比賽。」
享受舞台
雖然Sukie以網絡紅人的身份爆紅，但她的心卻離不開歌唱事業，一切緣於有始有終的個性：「我從來都冇一刻諗過放棄，我好享受嗰時嘅舞台，同埋好簡單，所有嘢都係好單純，單純係為咗做好音樂，做好表演畀人哋睇。其實要放棄真係好容易，一句話我唔撈就可以。但係我真係做唔出，我係嗰啲開咗個頭要完埋個尾，即係睇戲我唔可以睇一半跟住留番下次睇。我對自己都算要求高，好似我生一條白頭髮，都要去染髮嗰種呢，其實剪咗佢咪得囉，我使咩要咁辛苦呢！」
孝順雙親回港由零開始
本來可以留在台灣發展歌唱事業的Sukie，最終選擇回來香港，一切歸於一個「情」字，但並非愛情，而是親情。
Sukie的外表看似開放，但其實是個非常貼心的孝順女，當初為陪伴雙親，不惜放棄一切回港重新開始：「有次我搭車，見到有個阿伯，我望住佢隻手皺晒皮，我就好不自覺咁流眼淚，因為我諗起我阿爸。父母嘅年紀都開始大，真係唔知仲有幾耐時間可以同佢哋一齊。當自己年紀愈大，就會開始重視同父母相處嘅時間。都想陪多啲爸爸媽媽。呢個係好大嘅原因令我返咗嚟香港。」
我真係鍾舒漫個妹 唔黐家姐黐邊個？
相比起家姐鍾舒漫，Sukie的星途可謂截然不同，性格一向樂觀的她，並不介意外界將自己與家姐比較：「其實好多人都問我你成日都畀人叫鍾舒漫個妹，你唔會介意o架咩？唔好意思，我真係鍾舒漫個妹，我事實真係佢個妹，所以完全唔介意。同埋，佢係我家姐，我唔黐佢，咁我黐邊個呢？」
Sukie不但與家姐的感情甚好，更融入家姐的朋友圈：「家姐係一個好實際嘅人，佢幫我傾咗好多嘢，介紹咗好多朋友畀我識，所以我圈子入面，全部都係佢啲朋友嚟。」她笑言自己是大家的開心果。
高調談情拒「爬頭」結婚
不少藝人都怕公開戀情會影響事業，但Sukie正正相反，與Band友男友Arot Lee拍拖亦毫不避忌，她說：「其實我哋都識咗九年，拍咗四年拖，結婚？我係唔可以爬家姐頭，我唔會o架，等你呀家姐！一定要家姐結婚先，仲要佢生仔先！」
髮型：fifth salon Eas fu
場地：越男仔
鳴謝：Barry@J&B Ent
文：專案組
攝：劉斌