楊明拍劇趕「收工」險捱車撞
藝人楊明及王浩信昨日到元朗為新劇《兄弟》拍攝一場撞車戲，劇情講到兄弟二人反目，浩信為帶走線人更不惜開車撞楊明，險被車撞的楊明則吊威吔跳起，避過一劫，但拍攝期間不慎手(月爭)落地受傷，幸未有大礙。
見家長冇黑面
楊明透露一行人將於本月29日到菲律賓拍攝外景，希望出發前拍畢香港的戲份，回港便能享受農曆新年假期。問是否恨趕返港與女友莊思明團圓？他說：「思明都會返馬來西亞陪父母，如果佢留多幾日，我都想飛過去。（見過佢父母？）好熟o架喇，起碼見到我冇黑面先！（過咗最大嗰關？）要過埋佢嗰關先！」他坦言未到談婚論嫁階段：「冇傾到求婚，都想畀驚喜女仔，依家傾工作多，因為佢都接咗兩套劇。」講到當地治安欠佳，楊明表示去過菲律賓一次：「治安上雜少少，見到保安會帶真槍傍身。（擔心安全？）好似會有軍方保護，都有叫我哋唔好出酒店，要集體行動。」
王浩信潑冷水
而浩信透露與飾演兄弟的楊明能互相感應，問到有否感應到楊明希望能完成戲份放假的想法？浩信即潑冷水說：「唔得喇，每一場都好精彩，所以拍攝辛苦都值得。」講到因忙拍劇未能為入圍視帝拉票，他笑言：「都有嘅，我有喺網上同大家互動，依家做多咗，要犧牲吓休息時間，因為呢個機會都好難得。」
文：影視組