「廢青」都有市場！吳業坤男女通殺

吳業坤在無綫台慶劇《誇世代》中飾演包豹，一個名副其實靈魂與軀殼不相稱的角色，他說：「劇情講我同Bobby（歐陽震華）交換咗軀殼，聽監製講佢要一個好廢青嘅人去演，搵咗我！我仲喺造型上畀意見，務求一眼就睇得出好廢！（播出街嘅版本，你冇乜戲？）其實我開足半年工，拍咗好多，仲有同麥明詩嘅激烈感情戲，佢會打我心口打到Bom Bom聲，要拍唔同角度，不斷重複，我真係大犧牲，我預咗會傳緋聞，有愛情加動作喎！麥明詩選港姐嗰陣，佢段Speech深深吸引我，不過樣就無謂提！」

被我玷污過名字的女孩

坤坤令人又愛又恨的板斧，有「食好西」、「釣人食飯」等潮語，他說：「如果要我玩『吳業坤』呢三隻字，我會寫做『吳易坤』，吳業坤唔易昆o架！（但網上有人覺得被你偽宅男形象昆咗，變咗做你嘅Haters？）我有為負評唔開心過一吓，但好快過去！其實講慘我唔算慘，我連問屋企攞錢度日都未試過，實際上我亦唔算有低潮，比我慘嘅大有人在，我只係有段時間唔知自己可以做乜嘢啫！（目標好似包豹咁做男一？）之前有位前輩同我講，話佢都唔靚仔，但都可以做主角，只要有感情、熱愛呢個工作，就可以帶起成個戲！（搵齊傳過緋聞嘅女仔合作？）都得，但我諗我先做隻歌睇吓反應先，首歌就叫《那些年，被我玷污過名字的女孩們》，我強調係『名字』啫！」

文：影視組

攝：秦健輝

場地：I's Land Cafe