吳君如扮閻王跳舞開Party
女星吳君如首次執導兼主演的作品《妖鈴鈴》在內地上映踏入第二周，內地票房已過三億。君如今次兼顧幕前幕後，工作多籮籮仍傾力演出，在戲中分別以道士、女僕及閻羅王等多個裝扮亮相，她笑言：「雖然閻羅王啲鬚搞到我成晚又痕又熱，但拍出嚟嘅效果，加上搵咗盧海鵬配音，成個氣氛係威係勢！我哋仲為呢場戲排咗隻舞，十足開Party。」
君如又演又導特別疲累，幸得大班好友拔刀相助，令她力量倍增。君如扮女僕的同時，鎮宇及方中信亦化身執房男工，鎮宇笑說：「本來每人得一個造型咋，有多幾個造型好呀，最緊要係呢個Look充分發揮到我同方中信嘅靚仔天賦，佢唔使扮光頭，連頭髮都重生！」
