唐詩詠揭月入得$3,000哭訴家人接濟

唐詩詠昨日到電台接受直播訪問，本來輕鬆分享拍《不》劇的趣事，但當主持人阮兆祥問到如果贏得視后最想多謝的人，她竟然不禁哽咽起來，訴說2004年初入無綫時只得3,000港元月薪的辛酸！詩詠指當年遇上時任無綫高層的陳志雲（Stephen），對方主動問她人工有多少：「我講咗之後佢淨係講：『係呀？夠唔夠生活？』我話辛苦啲囉，之後佢話加咗我人工，我諗住係幾千，點知原來終於有萬幾蚊。」她直言很開心及感激對方，說時激動更感觸落淚：「嗰刻真係好感動！當時我啱啱入TVB，幾年都唔敢同公司講唔夠錢生活。喺演員路上，好好彩有啲人幫助我度過比較唔好嘅時刻。」

「絕世好女友」變壓力

詩詠自言當時年紀尚小，未懂得好好道謝：「擺咗喺心入面，一直希望有個機會可以多謝Stephen，可能要攞獎先可以多謝佢。」又形容對方對她的幫助很大，因原本每天只能乘坐巴士：「我住廣播道，巴士去到九龍城，如果好夜收工，15蚊的士都返到屋企。生活當然未必過到，好彩有屋企人幫助。不過出咗嚟做嘢，當然希望可以照顧番屋企人。」

唐詩詠初入行拍攝《四葉草》，當年月薪只得三千蚊。	唐詩詠近年劇接劇，相信人工已幾何級數上升！	唐詩詠與崔建邦及洪永城分手收場，自言「絕世好女友」稱號反成負擔。

雖然事業漸入佳境，但感情卻屢遭重創，先後與崔建邦、洪永城拍拖的詩詠不諱言「絕世好女友」的稱號，使另一半有很大壓力：「好似佢做咩都唔好咁！如果再拍拖，要小心處理男友嘅心理，或者自己都要做多少少，唔好令佢咁諗。」並希望日後拍拖時低調一點，覺得娛樂圈有太多事會影響感情：「有時自己知道啲新聞唔係真，但原來隔籬嗰個都會有唔舒服！如果畀我揀，想過咗最穩定嘅階段先公開，等對方了解到真正嘅我係點樣。」

靠朋友介紹男仔

提到2月將與馬國明拍攝以醫生為題材的新劇，詩詠稱暫時未能公布兩人有否愛情線，問到會否擔心再次傳出緋聞而阻礙搵新男友？她笑言傳得耐便不會成阻礙：「我唔心急嘅！（依家放假有冇識男仔？）冇呀！靠朋友出手，不過通常都係齋噏，黃翠如成日都噏，話要介紹醫生同專業人士畀我，我等緊。（結果冇？）唔知道但冇所謂，我都淨係想見佢啫。」又認為愛情要來便會來。

文：音樂組